INSTRUMENTOS

 INSTRUMENTOS QUE PODES APRENDER NA ESCOLA:

Trompa: É un instrumento de vento metal, coñecido dende fai séculos e usado, por exemplo, para dar sinais nas cacerías cando se coñecía por “tromba da caccia”. De son profundo e amable, ten un  amplo rexistro de grave a medio agudo. Ten catro chaves que se manexan coa man esquerda mentres que a man dereita colocada na campá incide conseguindo diferentes timbres. Moi versátil, adaptable a diversas agrupacións. 

Trompeta: Outro instrumento de vento metal moi antigo que ten as súas orixes nos exipcios. O son prodúcese ó vibrar os beizos dentro da peza que se coloca na boca, chamada embocadura. É un son claro e brillante cun rexistro medio a  agudo. Manéxase con tres chaves chamadas pistóns que se accionan coa man dereita mentres que a man esquerda pode accionar un ou dous tubos. Aparece en practicamente todos os estilos musicais.

Frauta travesa: A pesares de estar construída de metal forma parte da familia dos instrumento de vento madeira, pois na súa orixe facíanas deste material. O seu son  prodúcese ó chocar o sopro no borde do burato, chamado bisel. É de son limpo e cálido cun rexistro agudo a moi agudo. Ten 15 chaves que se accionan con nove dedos das dúas mans. Moi usado na música clásica, folk e popular.

 
Trombón: O trombón pertence á familia de vento metal, cuxos devanceiros están nas “trombas” romanas. De son claro e potente cun rexistro sonoro de grave a medio. Foi no S.XV cando se converteu nun instrumento tan versátil pois engadíuselle unha vara corredoira  que alonga ou encolle a lonxitude total modificando así os sons. É doadamente adaptable a diversas agrupacións.  

 
Clarinete: O clarinete é un instrumento da familia de vento madeira de son nobre e redondo e un rexistro sonoro agudo. Para facelo soar necesita un soprido ben dirixido cara unha cana de madeira que ten na súa embocadura. Ten 22 chaves e úsanse nove dedos das dúas mans. Utilizado en moitos tipos de agrupacións e estilos, dende a música clásica ao jazz.

 
Saxofón: Inventado por Adolphe Sax no 1846, axiña fíxose popular pola súa versatilidade. A pesares de ser de metal é un instrumento de vento madeira por ter, ó igual que o clarinete unha cana de madeira que produce a vibración sonora. De son metálico e harmónico cun rexistro medio agudo a agudo, está construído cun tubo cónico e  22 chaves nas que se colocan nove dedos das dúas mans. É un instrumento moi común na música moderna.  

Tuba:  A tuba pertence á familia de instrumentos de vento metal dado que ten unha embocadura onde se colocan os dous beizos para producir o son por medio da vibración destes. De son moi grave, redondo e medio escuro conta cun rexistro de notas dende moi graves a grave e é  moi usado en todos os estilos pola súa función de soporte sonoro. Ten catro chaves que se manexan xeralmente coa man dereita.

 

Bombardino: Pódese considerar o irmán pequeno da tuba, pois conserva a súa forma. Ten un son grave, redondo e escuro cun rexistro de grave a medio. Ten tres chaves con forma de pistóns que se manexan coa man dereita e outra que se manexa coa esquerda. Resulta, pola súa flexibilidade un instrumento moi melódico e é utilizado en moitas agrupacións. 

Piano: O piano é un dos Instrumentos máis populares, á vez que completos, que ten as súas orixes nos clavecíns do S.XVII. Pertence á familia de corda percutida pois dispón dun teclado de 88 teclas que accionan unhas pezas no seu interior. Estas golpean unhas cordas tensadas que producen un son moi característico cun rexistro de grave a moi agudo. Os pés poden accionar dous ou tres pedais de efectos sonoros. Usado en practicamente todas as agrupacións e estilos musicais.