A CASA DA MUSICA

A Escola de Música está sita na Reitoral de S. Martiño, Abelendo, un edificio histórico do S. XVI e S. XVII incluído no catálogo de patrimonio cultural da Comunidade Autónoma de Galicia como ben de especial protección. Conta, entre outros atractivos, cunha lareira do S. XVI, unha lagareta do S. XVII e a réplica a escala real do tímpano da igrexa de S. Martiño realizada no 2018. Tras unha reconstrución levada a cabo polo Obradoiro de emprego xestionado polo Padroado Beiramar dos anos 2008 a 2010 e un acondicionamento posterior para adaptala ás necesidades deste tipo de centro foi finalmente destinada para a actividade musical.

A escola conta con catro aulas e unha sala de usos múltiples. Esta última está destinada aos ensaios das diferentes agrupacións, actividades complementarias, clases de movemento e de baile e tamén á celebración de eventos, audicións e pequenos concertos. Cun aforo para 75 persoas é o espazo onde a música se escoita no seu estado máis inmediato, acabada de saír do forno.

Unha das catro aulas ten unha superficie de 35m2, preparada co material preciso, na que se realizan moitas das actividades cos máis cativos, como Iniciación Musical, Musicactiva ou os obradoiros de Música para Bebés ou Musicaventuras.

As outras tres aulas teñen 18m2 e destínanse principalmente a clases de instrumento, tanto individuais como colectivas.

Ademais dos espazos das aulas, a escola conta cunha sala de recepción, despacho, unha sala de agarda e, no exterior, un patio axardinado onde os alumnos e alumnas descansan entre clase e clase.

Na parte traseira deste emblemático edificio sitúase a carballeira de San Martiño, espazo natural e absolutamente axeitado para desenvolver calquera actividade musical, pois a sonoridade das carballeiras parece estar creada a conciencia. Este espazo úsase varias veces ao longo do curso en diversos eventos propios e doutras agrupacións.